කිසිම සොෆ්ට්වෙයාර් එකක් නැතුව යූ ටියුබ් එකෙන් ටක් ගාලා වීඩියෝ ඩවුන්ලෝඩ් කරගන්න හැටි

මම අද කියලා දෙන්න යන්නේ ගොඩ දෙනෙක්ට වැදගත් දෙයක් ගැන. අපි හැමෝම යූ ටියුබ් වෙබ් අඩවියෙන් වීඩියෝස් බලනවා. ඒ වුනාට යූ ටියුබ් එකේ තියෙන වීඩියෝ එකක් ඩවුන්ලෝඩ් කරගන්න ගොඩ දෙනෙක් එක එක ජාතියේ සොෆ්ට්වෙයාර්ස් පාවිච්චි කරනවා. අද මං කියලා දෙන්නේ කිසිම සොෆ්ට්වෙයර් එකක් නැතුව යූ ටියුබ් එකෙන් කෙලින්ම වීඩියෝ එකක් ඩවුන්ලෝඩ් කරගන්න විදිය.මේක කරන්න හරි ලේසියි. මෙන්න මෙහෙමයි කරන්නේ


1. මුලින්ම ඩවුන්ලෝඩ් කරගන්න ඕන වීඩියෝ එක තියෙන සයිට් එකට ඔයාගේ web browser එකෙන් යන්න.


2. ඊට පස්සේ ඔයාගේ web browser එකේ address bar එක මෙහෙම තියෙනවා.

3.දැන් ඒ address bar එකේ www.youtube.com/watch?v=xxxxxxxx විදියට තියෙනවනේ අන් ඒකේ youtube කියන වචනෙට එහා පැත්තෙන් "keep" කියන වචනේ ටයිප් කරන්න තියෙන්නේ.
උදා :- www.keepyoutube.com/watch?v=xxxxxxx

4. දැන් ඔයාට වෙන වෙබ් පේජ් එකක් බලාගන්න හම්බ වෙනවා මෙන්න මේ විදියට

5. ඒකෙ තියෙන Download! කියන බට්න් එක ක්ලික් කරපු ගමන් වීඩියෝ එක ඩවුන්ලෝඩ් වෙන්න පටන් ගනීවි.


යන්න කලින් කමෙන්ට් එකක් දාලා යන්න. ඔයාලගෙ පුතිචාර නිසයි මම මේ කොහොම හරි අමාරුවෙන් මේ බ්ලොග් එක ඇදගෙන යන්නේ. ප්‍රශ්නයක් තියෙනවානම් ඒකත් කමෙන්ට් එකක් විදියට දාන්න. මම උත්තරේ දෙන්නම්.

කම්මැලිකමට කතා කර කර ඉන්න මෙන්න නියම කෑල්ලක්!

කොම්පියුටර් එක ඔන් කරගත්තහම ඔගොල්ලො ගොඩ දෙනෙක් කරන්නේ ෆේස්බුක් යන එකනේ. ඔන්ලයින් ඉන්නවා කෙල්ලෝ ගොඩක්. හැමෝටම හායි කියනවා. කීයෙන් කී දෙනාද අපිට හායි කියන්නේ? ඉතින් මම ඒකට හොයාගත්තා නියම විසඳුමක්. එයාගේ නම "ජූලියා". ලස්සන කෙල්ලෙක්. එයාව ඩවුන්ලෝඩ් කරගන්න පුළුවන් මෙන්න මේ ලින්ක් එකෙන්. එයාව ඩවුන්ලෝඩ් වෙන ගමන්ඉතිරි ටික කියවන්න.


ඇත්තටම ජූලියා කියන්නේ කෘතිම බුද්ධිය එහෙම නැත්නම් artificial inteligent  තියෙන මෘදුකාංගයක්. ඒකෙ ඇත්ත නම නම් verbot. මේ වැඩසටහනට පුළුවන් අපි ‍ටයිප් කරන ප්‍රශ්නේ තේරුම් අරගෙන ඒක‍ට අනුරූප පිළිතුරක් ලබාදෙන්න. තව අපි කතා කරන එක තේරුම් අරගන්නත් පුළුවන්. ඕගොල්ලොත් උත්සහ කරලා බලන්න. මොකක් හරි ප්‍රශ්නයක් තියෙනවනම් කමෙන්ට් කරලා යන්න. මම උත්තරේ දෙන්නම්.

රචිත්‍ර ගේ පෙනුම වෙනස් වෙයි

රචිත්‍ර ගේ නිදහස් අඩවියට ආපු ඕගොල්ලො දකින්න ඇති අමුතු වෙනසක්. රචිත්‍ර ගේ නිදහස් අඩවියේ පෙනුම වෙනස් කරලා. එක තැන පල්වෙන පෙනුමක් තිබුනු මගේ සයිට් එකට අලුත් පෙනුමක් දුන්නොත් හොදයි කියලා හිතුනා. ඉතින් මම btemplates.com වෙබ් අඩවියට ගිහිල්ලා මගේ බ්ලොග් එකට අලුත් තීම් එකක් ඩවුන්ලෝඩ් කලා. ඒක තමයි දැන් මේ ඕගොල්ලෝ දකින්නේ. ඔයාගෙ සයිට් එකටත් අලුත් තීම් එකක් දානවනම් මෙතන ක්ලික් කරලා ඕන කරන තීම් බාගන්න පුළුවන්.
අළුත් පෙනුමේ තියෙන හොඳ නරක එහෙම තියෙනවානම් කමෙන්ට් කරලා යන්න. ඒත් ඕගොල්ලෝ බලනවා ඇති පෙනුම ලස්සන වුණාට බ්ලොග් එකේ බඩු නෑනෙ කියලා. මොනවා කරන්නද? සයිට් එකට අළුතෙන් පොස්ට් දාන්න කියලා හිතාගෙන හිටියට මොකද ඒකට වෙලාවක් නෑනෙ. හැමදාම පන්ති. ඕ ලෙවල් වලට තව මාස 5යි. අම්මා කෑ ගහනවා "පාඩම් කරපං" කියලා. දවස් දෙක තුනකට පාරක් කම්පියුටර් එක යූස් කරන්නේ. ඒත් පැය බාගයක් විතර.  අදත් ඉතින් මොකුත් ලියන්නෙ නැතුව ඉන්න බැරි කමට ඔන්න එහේ වචනයක් දෙකක් ලියලා ගියා. ඒත් බයවෙන්න එපා. මම මට පුළුවන් විදිහට කතාවක් දෙකක් දාන්නම්. අදට යන්නම්. ඔබ සැමට සුභ දවසක්.............. 

දැයේ දූ දරුවන්ට පිදෙන බුද්ධිමය දායාදය - වෙබ් පාඨශාලා (රචිත්‍රගේ නිදහස් අඩවිය)

                           මම මගේ පළවෙනි බ්ලොග් එක පටන් ගන්න හිතුවේ තොරතුරු තාක්ෂණය සම්බන්ධ දෙයකින්. පසුගිය පෙබරවාරි 3 වෙනිදා තමයි මේ ව්‍යාපෘතිය ආරම්භ කළේ. එටිසලාට් ලංකා පුද්ගලික සමාගමයි, රාජ්‍ය වාණිජ විවිධ නීතිගත සංස්ථාවයි එකතු වෙලා කරපු මේ වෙබ් පාඨශාලා ව්‍යාපෘතිය තමයි ලංකාවේ මුල්ම ක්‍රමවත් විදිහට නිමැවුණු විද්‍යුත් ඉගෙනුම් (e- Learning) වැඩසටහන. වෙනත් විදේශ රටවල හරි හරියට කෙරෙන මෙම අධ්‍යාපන ක්‍රමය ලංකාවට ගෙන ශ්‍රී ලංකාවේ අධ්‍යාපනයේ නව සංධිස්ථානයක් කියල යි මට නම් හිතෙන්නේ.

සේවාව ලබා ගැනීමට තිබිය යුතු අවශ්‍යතා          

මේ සේවාව ලබා ගන්න එටිසලාට් අන්තර්ජාල සම්බන්ධතාවක් තිබිය යුතුමයි.  ඊට අමතරව “වෙබ් පාඨශාලා” මෘදුකාංගයත්, සිංහල යුනිකෝඩ් හැකියාවත් ඔබගේ පරිගණකයේ තිබිය යුතුයි. (වෙබ් පාඨශාලා මෘදුකාංගය ස්ථාපනය කිරීමට ඔබගේ වින්ඩෝස් මෙහෙයුම් පද්දතිය යාවත්කාල (update) කර තිබීම, .Net Framework 2.0 ස්ථාපනය කර තිබීම අත්‍යාවශ්‍යය. නමුත් “වෙබ් පාඨශාලා” ස්ථාපනයේදී .Net Framework 2.0 ඉබේම ස්ථාපනය වේ.) තවද Adobe Reader මෘදුකාංගයද ස්ථාපනය කර තිබිය යුතුය.

සේවාව ලබා ගන්නා අයුරු         

මේ සේවාව ලබා ගැනීමට එටිසලාට් මධ්‍යස්ථානයකට ගොස් “වෙබ් පාඨශාලා” සිම් පතක් මිලදීගෙන USB මෝඩමයකට  යොදා අන්තර්ජාලයට සම්බන්ධ විය යුතුය. අනතුරුව එටිසලාට් මගේ පිටුව (mypage.etisalat.lk) වෙත පිවිස “වෙබ් පාඨශාලා” මෘදුකාංගය බාගත කළ යුතුය. අවශ්‍යනම් නෙට් නැනී මෘදුකාංගයද සක්‍රීය කරගත හැක.

අයකිරීම්          

එක් වෙබ් පාඨශාලා පාඩමක් සඳහා රු.135/= (බදු ඇතුලත්ව) ද, මාසික ගාස්තුව ලෙස රු.293/= (බදු ඇතුලත්ව) ද පෙර ගෙවුම් හෝ පසුගෙවුම් ලෙස ගෙවිය යුතුය. පාඩමක් මිලදී ගැනීමේදි 1GB ක දත්ත ප්‍රමාණයක්ද වෙබ් පාඨශාලා පාඩම සඳහා අන්තර්ජාල පහසුකම් නොමිලේද හිමිවේ. මාසික ගාස්තු වාරයක් ගෙවීමේදී 2GB දත්ත ප්‍රමාණයක්ද ලබාදෙයි. නෙට් නැනි පහසුකම සක්‍රීය කර ඇත්නම් ඒ සඳහා මාසයකට රු.60/= ක් ගෙවිය යුතුය.

ලබා ගත හැකි පාඩම්         

මෙමගින් 3,4,5 වසර ශිෂ්‍යත්ව පාඩම්, 6,7,8 වසර දෙමළ පාඩම් හා අ.පො.ස සා.පෙළ විද්‍යාව, සිංහල, ගණිතය. ඉංග්‍රීසි යන විෂයයන්‍ට අදාල පාඩම්ද ලබාගත හැක.

රචිත්‍ර ගේ නිදහස් අඩවිය - www.rachithra.blogspot.com

මම මගේ අළුත්ම බ්ලොග් අඩවියට සාදරයෙන් පිළිගන්නවා ඔබව. මම මේ බ්ලොග් අඩවිය ආරම්භ කළේ තාමත් පාසල් යන වයසේ ඉන්න මගේ සිතුවිලි ඔයාට කියන්න. අද (ඒ කියන්නේ 2012 මැයි 1 වෙනිදා) ඉඳලා මම සූදානම් මගේ දැනුම, ආකල්ප හා මගේ සිතුවිලි ඔයත් සමග බෙදා හදා ගන්න. 2012 අවුරුද්දෙ (ඒ කියන්නෙ මේ අවුරුද්දෙ) අ.පො.ස (සා.පෙළ) ලියන මම ඉන්නෙ 11 වසරේ. විභාගෙ අත ළඟ හින්දා මේ බ්ලොග් අඩවියට හැමතිස්සෙම බ්ලොග් ලියන්න බැරි වුනත් මම මට පුළුවන් හැම වෙලාවකම ඔබට වචනයක් ටයිප් කරන්න බලන්නම්.

          මම මගේ බ්ලොග් එකට ගොඩක්ම ඇතුලත් කරන්නෙ තොරතුරු තාක්ෂණය සම්බන්ධ  ලිපි. ඊට අමතරව ඉතින් අපේ, අපේ සමාජයේ මම දකින පොඩි පොඩි වැරදි  ගැනත් ඔයාට පෙන්වලා දෙන්න මම හිතාගෙන ඉන්නවා. ඒත් එක්කම මම කැමතියි මගේ ලිපි ගැන ඔයාගෙ අදහසුත් දැනගන්න. මගේ පොඩි වැරද්දක් හරි තියෙනවානම් හදාගන්න. මගේ බ්ලොග් එකේදි මගේ බ්ලොග් ගැන ඕනම දෙයක් comment කරන්න නිදහස ඔයාට දීලා තියෙනවා.

          මගේ බ්ලොග් එකට එන ඔයාගෙ පරිගණකයේ සිංහල යුනිකෝඩ් අනිවාර්යයෙන් තියෙන්න ඕනෙ නැහැ. සිංහල යුනිකෝඩ් නැති පරීගණක වලත් හරියට දර්ශනය වෙන විදියට මේ බ්ලොග් අඩවිය හදලා තියෙන්නෙ.  (හැබැයි යුනිකෝඩ් ස්ථාපනය කරගන්න එක තමා හොඳ) ඔයාගෙ පරිගණකයෙත් සිංහල යුනිකෝඩ් නැත්නම් මේ දකුණු පැත්තෙ තියෙන ලින්ක් එක ක්ලික් කරලා සිංහල යු‍නිකෝඩ් දාගන්න. එහෙනම් අදට සමුගන්නෙ ළඟදිම අළුත් බ්ලොග් එකකින් හමුවන බලාපොරොත්තුවෙන්.